Fauvismus

Dr Foowismus (vo frz. fauves, wildi Dier) isch in dr Kunstgschicht e Stiilrichdig in dr Moolerei. Er isch us ere Beweegig innerhalb vo dr franzöösische Avantgarde am Aafang vom 20. Joorhundert entstande. Dr Foowismus isch vo seer underschiidlige Künstler dräit worde und isch die ersti Beweegig vo dr klassische Modärne gsi.

D Hauptverdräter vo dr Beweegig si dr Henri Matisse, dr André Derain und dr Maurice de Vlaminck gsi. Iine häi sich dr Raoul Dufy, Albert Marquet, Kees van Dongen, Othon Friesz und dr Georges Braque aagschlosse.^[1][2] E baar Kunsthistoriker zelle au dr Henri Manguin, Charles Camoin, Jean Puy und dr Louis Valtat zu de Fauves, nöijerdings au dr Georges Rouault.^[3]

In de foowistischen Bilder het dr Zwäck vo dr Farbgääbig nüm die illusionistischi Daarstellig vom ene Geegenstand sälle si. Die moolerischi Ussaag isch us em Zämmeschbiil vo de Farbflechene entstande. Tüpisch für die mäiste Wärk si iiri lüüchtende Farbe. Aber e genauso wääsentlige Bestanddäil vo dr Bildkomposizioon si d Überleegige zur Daarstellig vom Ruum gsi.^[4]

Dr Foowismus isch us em Impressionismus gwaggse. Aber si Ziil isch gsi, dr Flüchtigkäit vo de impressionistische Bilder Parooli z biete und de Wärk mee Duur (frz. durée) z verschaffe. En äigeni Theorii oder e Manifest het dr Foowismus nit ghaa. Noch ere nöijere Sichtwiis häig dr Foowismus Gmäinsamkäite mit em Expressionismus.

1907 het dr Kubismus dr Foowismus abglööst und e baar vo sine Verdräter häi sich dr jüngere Beweegig aagschlosse. Es chunnt vom Foowismus, ass modärni Künstler d Farb as individuells Usdrucksmiddel gseen.

1. ↑ Marcel Giry: Der Fauvismus, 1981, S. 6–8
2. ↑ Jean Leymarie: Fauvismus, 1959, S.38
3. ↑ Sabine Rewald: Heilbrunn Timeline of Art History. Department of Nineteenth-Century, Modern and Contemporary Art, The Metropolitan Museum of Art, abgruefen Fehler bei Vorlage:Internetquelle, abruf=9. Merz 2011 Format invalid. 
4. ↑ Marcel Giry, Der Fauvismus, 1981, S. 7–9